ဘုန်းမောက်နဲ့ ၂-၂ သရေကျခဲ့တဲ့ ပရီးမီးယားလိဂ် ပွဲစဉ်မှာ ဒိုင်လူကြီးတွေရဲ့ ဆုံးဖြတ်ချက်တွေ အပေါ် ယူနိုက်တက် နည်းပြ မိုက်ကယ် ကာရစ်ခ်က ဝေဖန်မှုတွေ ပြုလုပ်လာပါတယ်။ ကာရစ်ခ်ဟာ ဒီပွဲရဲ့ ဒိုင်လူကြီးတွေရဲ့ ဆုံးဖြတ်ချက်တွေကို “ရူးကြောင်ကြောင်နိုင်လွန်းတယ်” လို့ ပြင်းပြင်းထန်ထန် ဝေဖန် ပြောဆိုလိုက်တာ ဖြစ်ပါတယ်။
ဗိုက်တယ်လတီကွင်းမှာ ကစားခဲ့တဲ့ အဲဒီ ပွဲစဉ်မှာ ယူနိုက်တက်ဟာ နှစ်ကြိမ်တိုင်တိုင် ဦးဆောင်နိုင်ခဲ့ပေမယ့် ဘုန်းမောက်ရဲ့ ချေပဂိုးတွေကို ခွင့်ပြုခဲ့ရသလို၊ ပွဲချိန် နှောင်းပိုင်း မှာလည်း ခံစစ်မှူး ဟယ်ရီ မက်ဂွိုင်းယား အနီကတ်ပြ ထုတ်ပယ်ခံခဲ့ရတာကြောင့် အမှတ်ခွဲပေးခဲ့ရတာပါ။ ပွဲကစားချိန် ၈၁ မိနစ်မှာ ဘုန်းမောက် တိုက်စစ်မှူး အီဗန်နီလ်ဆင်ကို ဂိုးဧရိယာ အတွင်း တွန်းလှဲခဲ့တာကြောင့် မက်ဂွိုင်းယား တယောက် တိုက်ရိုက် အနီကတ်ပြခံခဲ့ရပြီး ပင်နယ်တီပါ ပေးခဲ့ရပါတယ်။ အဲဒီ ပင်နယ်တီ ကိုတော့ ဘုန်းမောက် လူငယ် ကြယ်ပွင့် ဂျူနီယာ ခရူပီက အမှားအယွင်း မရှိ ကန်သွင်းပြီး ၂-၂ သရေ ဖြစ်စေခဲ့တာပါ။
မက်ဂွိုင်းယား အနီကတ်ပြ မခံရခင် ပွဲချိန် ၆၇ မိနစ်မှာ ယူနိုက်တက် တောင်ပံ ကစားသမား အာမက်ဒ် ဒီယာလို ဟာလည်း ပြိုင်ဘက် ကစားသမား အက်ဒရီယန် ထရူးဖတ်ရဲ့ ဆွဲလှဲခြင်းကို ခံခဲ့ရပါတယ်။ ဒါပေမယ့် ကွင်းလယ်ဒိုင် ဖြစ်သူ ကတော့ ထိတွေ့မှု မလုံလောက်ဘူး ဆိုတဲ့ အကြောင်းပြချက်နဲ့ ပင်နယ်တီ မပေးခဲ့ပါဘူး။ ဒါ့အပြင် အဲဒီ ပြစ်ဒဏ်ဘော မရခဲ့တာ ကနေ ဘုန်းမောက်က ချက်ချင်း တန်ပြန် တိုက်စစ်ဆင်ပြီး သွင်းဂိုးလည်း ရယူနိုင်ခဲ့ပါသေးတယ်။
ပွဲအပြီး BBC Match of the Day နဲ့ အင်တာဗျူးမှာ ကာရစ်ခ်က ပရီးမီးယားလိဂ် ဒိုင်လူကြီးတွေရဲ့ စံနှုန်း မညီတဲ့ ဆုံးဖြတ်ချက်တွေ အပေါ် အခုလိုပဲ ပွင့်ပွင့်လင်းလင်း ပြောကြားခဲ့ပါတယ်။ “တကယ်ကို စိတ်ပျက်ဖို့ ကောင်းပါတယ်။ ကျွန်တော်တို့ အခွင့်အရေးတွေ အများကြီး ဖန်တီးနိုင်ခဲ့သလို ၂-၀ နဲ့ ဦးဆောင်နိုင်မယ့် အခွင့်အရေးလည်း ရှိခဲ့တယ်။ ဒါပေမယ့် ဒိုင်လူကြီးက ပင်နယ်တီ တစ်ကြိမ် ပေးပြီး နောက်ထပ် တစ်ကြိမ် ကျတော့ မပေးခဲ့ဘူး။ တကယ်တော့ ဖြစ်ရပ် နှစ်ခု စလုံးက လက်နှစ်ဖက်နဲ့ ဆွဲလှဲတာချင်း အတူတူပါပဲ။”
“ဒိုင်လူကြီး တစ်ခုခုတော့ မှားနေပြီ။ ဘယ်ဟာက အမှန်လဲ ဆိုတာ ကျွန်တော် မသိပေမယ့် ဒုတိယ တစ်ကြိမ် ကိုတော့ သူ မပေးခဲ့ဘူး။ ကျွန်တော့် အမြင် မှာတော့ နှစ်ကြိမ်စလုံးက ပင်နယ်တီတွေပါ။ ပထမ တစ်ကြိမ်ကို ပင်နယ်တီလို့ ယူဆရင် ဒုတိယ တစ်ကြိမ် ကလည်း ပင်နယ်တီ ဖြစ်ကို ဖြစ်ရပါမယ်။ ဒါကို မပေးတာ ကတော့ တကယ့်ကို ရူးကြောင်ကြောင်နိုင်လွန်းပါတယ်။”လို့ ကာရစ်ခ်က ဆိုပါတယ်။
ဒီပွဲစဉ်ဟာ ၂၀၂၂ ခုနှစ် အောက်တိုဘာလက ဖူလ်ဟမ်နဲ့ အက်စတွန်ဗီလာ ပွဲစဉ် နောက်ပိုင်း ပင်နယ်တီ၊ ကိုယ့်ဂိုးကိုယ်သွင်းမှုနဲ့ အနီကတ်တို့ တစ်ပွဲတည်းမှာ အကုန် မြင်တွေ့ခဲ့ရတဲ့ ပထမဆုံး ပရီးမီးယားလိဂ် ပွဲစဉ်လည်း ဖြစ်လာခဲ့ပါတယ်။ မန်ချက်စတာယူနိုက်တက်ဟာ မတ်လ အတွင်း နိုင်ငံတကာ ပွဲစဉ် နားရက်နဲ့ အက်ဖ်အေဖလား ပွဲစဉ်တွေကြောင့် ဧပြီလ ၁၀ ရက်ကျော် အထိ အနားရနေမှာပါ။ ယူနိုက်တက်ဟာ ဧပြီလ ၁၃ ရက်နေ့ မှသာ လိဒ်စ်ယူနိုက်တက်နဲ့ ပရီးမီးယားလိဂ် အိမ်ကွင်း ပွဲစဉ်ကို ပြန်လည် ကစားရမှာ ဖြစ်ပါတယ်။ ကာရစ်ခ် ကတော့ အခုလို နားရက် ရှည်သွားတာက ပြဿနာ မဟုတ်ကြောင်းနဲ့ လိဒ်စ်နဲ့ ပွဲအတွက် အသင်းသားတွေ အဆင်သင့် ဖြစ်နေမှာပါလို့ ပြောကြားသွားခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
