လာလီဂါ ထိပ်သီး ရီးရဲလ်မက်ဒရစ် ကတော့ လိုက်ပ်ဇစ် ကြယ်ပွင့် ဒီယိုမန်ဒီကို မြင့်မားတဲ့ ပြောင်းရွှေ့ကြေးနဲ့ ခေါ်ယူနိုင်ဖို့ နီးစပ်နေပြီ ဖြစ်ပါတယ်။
အသက် ၁၉ နှစ် အရွယ် အိုင်ဗရီကို့စ် တောင်ပံ တိုက်စစ် ကစားသမားဟာ လစ်ဗာပူးလ်၊ မန်စီးတီးနဲ့ ပီအက်စ်ဂျီ တို့ရဲ့ စိတ်ဝင်စားမှုကို အပြိုင်အဆိုင် ရရှိထားပြီး ဒီနွေရာသီ အပြောင်းအရွှေ့ ဈေးကွက်မှာ အလိုချင်ဆုံး ကစားသမားတွေထဲက တစ်ဦး ဖြစ်ခဲ့တာပါ။
အစပိုင်းမှာတော့ ဒီယိုမန်ဒီဟာ ဥရောပ ချန်ပီယံရှော့ပ် နှစ်ကြိမ်ဆက် ရရှိထားတဲ့ ပီအက်စ်ဂျီဆီ ပြောင်းရွှေ့ဖို့ ဦးစားပေးခဲ့ပေမယ့် ရီးရဲလ်မက်ဒရစ် အပြိုင်အဆိုင် ပါဝင်လာချိန် မှာတော့ အခြေအနေတွေ ပြောင်းလဲသွားခဲ့ပါတယ်။ အခုအခါ မက်ဒရစ် တို့ဟာ ပြိုင်ဘက်တွေကို အသာစီးရသွားခဲ့ပြီး လိုက်ပ်ဇစ် အသင်းနဲ့ ပြောင်းရွှေ့ကြေး မူအားဖြင့် သဘောတူညီမှု ရရှိခဲ့ပြီလို့ သတင်းထောက် ဘန် ဂျက်ကော့ဘ်က ဖော်ပြခဲ့ပါတယ်။
သတင်းထောက် ဖာဘရီဇီယို ရိုမာနိုရဲ့ အဆိုအရ မက်ဒရစ်ဟာ ဒီလူငယ်လေး အတွက် ယူရို သန်း ၁၀၀ ကျော် သုံးစွဲခဲ့တာ ဖြစ်ပြီး၊ ဒီတပတ် အတွင်း ဆေးစစ်မှု အောင်မြင်ပြီးရင် ၂၀၃၁ ဇွန်လ အထိ စာချုပ်ချုပ်ဆိုသွားမှာ ဖြစ်ပါတယ်။ AS သတင်းစာ ကတော့ လာလီဂါ ကလပ်ရဲ့ ဒီယိုမန်ဒီရဲ့ အပိုဆုကြေး အပါအဝင် စုစုပေါင်း သဘောတူညီမှုဟာ ယူရို ၁၂၀ သန်း အထိ ရှိနိုင်တယ်လို့ ဖော်ပြထားပါတယ်။
ရီးရဲလ်မက်ဒရစ်တို့ ရရှိလိုက်တဲ့ ဒီယိုမန်ဒီက ဘယ်လို ကစားသမားလဲ
အပြောင်းအရွှေ့သာ အမှန်တကယ် ဖြစ်မြောက်ခဲ့ရင် မက်ဒရစ်တို့ အနေနဲ့ ဈေးကွက်ထဲက အရည်အသွေးမြင့် ပါရမီရှင် လူငယ် တစ်ဦးကို အရယူနိုင်ခဲ့လို့ ဂုဏ်ယူဝမ်းမြောက်စရာ ဖြစ်လာပါလိမ့်မယ်။ လာမယ့် နိုဝင်ဘာမှ အသက် ၂၀ ပြည့်မယ့် ဒီယိုမန်ဒီဟာ ၂၀၂၄-၂၅ ရာသီတုန်းက မက်ဒရစ်မြို့ အခြေစိုက် လီဂါနက်စ်မှာ တစ်ရာသီ ကစားခဲ့ဖူးပြီး၊ လိုက်ပ်ဇစ်ဆီ ပြောင်းရွှေ့ပြီးနောက် မှာတော့ တဟုန်ထိုး တောက်ပလာခဲ့သူပါ။
သူဟာ ၂၀၂၅-၂၆ ရာသီ ဘွန်ဒက်စ်လီဂါမှာ ၁၂ ဂိုးသွင်း၊ ၈ ဂိုး ဖန်တီးကာ လိုက်ပ်ဇစ်အသင်းကို အဆင့် (၃) နေရာ ချိတ်ဆက်နိုင်အောင် ကူညီပေးခဲ့ပါတယ်။ ဒါကြောင့် မိုက်ကယ် အိုလီဆေး၊ အဲလ်ဖွန်ဆို ဒေးဗီးစ်နဲ့ အူစမန် ဒမ်ဘီလီ တို့ ရရှိခဲ့ဖူးတဲ့ လိဂ်ရဲ့ တစ်နှစ်တာ အကောင်းဆုံး လူငယ်ကစားသမားဆု ကိုလည်း ဆွတ်ခူးနိုင်ခဲ့ပါတယ်။
ခြေနှစ်ဖက်စလုံး ကျွမ်းကျင်စွာ အသုံးပြုနိုင်ပြီး တောင်ပံ နှစ်ဖက်စလုံးမှာ ကစားနိုင်တဲ့ ဒီယိုမန်ဒီဟာ ဥရောပ ဘောလုံးလောကမှာ လျှပ်စီးလို လျှင်မြန် ထက်မြက်တဲ့ တိုက်စစ်မှူး တစ်ဦး ဖြစ်လာခဲ့ပါတယ်။ ပြီးခဲ့တဲ့ ဒီဇင်ဘာလက ဖရင့်ဖတ်ကို ၆-၀ နဲ့ အနိုင်ရခဲ့တဲ့ ပွဲမှာ သူ့ရဲ့ ပထမဆုံး ဟက်ထရစ်ကို သွင်းယူခဲ့ပြီးနောက် လူစိတ်ဝင်စားမှု ပိုမို ရရှိလာခဲ့တာ ဖြစ်ပါတယ်။
ပြီးခဲ့တဲ့ရာသီ ဘွန်ဒက်စ်လီဂါမှာ တော်တော်များများထက် အသာစီးရခဲ့တာ ကတော့ သူ့ရဲ့ ၁၁၈ ကြိမ်မြောက် အောင်မြင်ခဲ့တဲ့ လိမ်ခေါက် ကျော်ဖြတ်မှု စံချိန်ပဲ ဖြစ်ပါတယ်။ ဂိုးသွင်း၊ ဂိုးဖန်တီးနိုင်စွမ်း အပြင် မမောနိုင်မပန်းနိုင် လိုက်လံ ဖိအားပေး ကစားနိုင်တဲ့ စိတ်ဓာတ်ကြောင့်လည်း ချီးကျူးခံခဲ့ရပြီး ဂျာမနီ ထိပ်သီးလိဂ်မှာ သူ့ထက် ဘောလုံး ယှဉ်ပြိုင်လုယူမှု (၄၃၇ ကြိမ်) ထက် ပိုသာသူ တစ်ယောက်မှ မရှိခဲ့ပါဘူး။
ဒီယိုမန်ဒီဟာ ‘ကြယ်စင်စု’အဆင့်မီရဲ့လား
ရွေးကောက်ပွဲ မဲဆွယ်စဉ် ကာလတုန်းက အသင်းဥက္ကဋ္ဌ ဖလောရန်တီနို ပီရက်ဇ်ဟာ အသင်းရဲ့ ‘ကြယ်စင်စု’ သမိုင်းကြောင်းကို ဆက်လက် ထိန်းသိမ်းဖို့ ဈေးကြီးတဲ့ ကစားသမားတွေကို ခေါ်ယူဦးမယ်လို့ အရိပ်အမြွက် ပြောကြားခဲ့ဖူးပါတယ်။ တစ်ချိန်က မိုက်ကယ် အိုလီဆေးကို ခေါ်ယူဖို့ ပီရက်ဇ် ရည်ရွယ်ခဲ့ပေမယ့် ဒီနွေရာသီ မှာတော့ မဖြစ်နိုင်တော့ပါဘူး။ အက်တလက်တီကိုမက်ဒရစ်ရဲ့ ဟူလီယန် အဲလ်ဗာရက်ဇ်ကို ကမ်းလှမ်းခဲ့တာ ကလည်း ပြိုင်ဘက်ကို စိတ်အနှောင့်အယှက် ပေးရုံလောက်ပဲ ဖြစ်ခဲ့ပါတယ်။
ဒီယိုမန်ဒီဟာ ကမ္ဘာ့အလိုချင်ဆုံး လူငယ် ပါရမီရှင်တွေထဲက တစ်ဦး ဖြစ်ပေမယ့် အိုလီဆေး သို့မဟုတ် အာလင်း ဟားလန်း တို့ရဲ့ အဆင့်အတန်းမျိုးတော့ မရှိသေးပါဘူး။ ပြောရရင် စစ်မှန်တဲ့ ကြယ်စင်စု တစ်ဦး မဟုတ်သေးသလို အနည်းဆုံးတော့ လက်ရှိ အခြေအနေမှာ မဟုတ်သေးပါဘူး။ ဒီလို ခေါ်ယူမှုဟာ ဝယ်ယူမှုကြီးတွေကို စောင့်မျှော်နေတဲ့ ပရိသတ်တွေကို ကျေနပ်စေပါ့မလား ဆိုတာ စောင့်ကြည့်ရဦးမှာ ဖြစ်ပေမယ့်၊ ပီရက်ဇ် အနေနဲ့ ဥရောပ ချန်ပီယံ ပီအက်စ်ဂျီကို လက်ဦးမှုယူ အနိုင်ရလိုက်တာ ကိုတော့ ဂုဏ်ယူ ဝင့်ကြွားနိုင်မှာပါ။ မာ့ခ် ကူကူရယ်လာ၊ ဘာနာဒို ဆေးလ်ဗား၊ အီဘရာဟီမာ ကိုနာတေးနဲ့ ဒန်ဇဲလ် ဒမ်းဖရီးစ် တို့လို ပိုမို စနစ်ကျတဲ့ ခေါ်ယူမှုတွေ အပြီးမှာ ဒီယိုမန်ဒီ ကို ခေါ်ယူလိုက်တာက ပီရက်ဇ် တစ်ကျော့ပြန် စိတ်ကြိုက် ပျော်မြူးလိုက်တာလို့ ပြောလို့ ရပါတယ်။
ဗင်နီးစီးယက်စ်နဲ့ ရိုဒရီဂိုတို့ အတွက် ဘယ်လို အဓိပ္ပာယ် သက်ရောက်နိုင်သလဲ
သီအိုရီအရတော့ ဒီယိုမန်ဒီ ရောက်လာတာဟာ အသက် ၂၆ နှစ် အရွယ် ဗင်နီးစီးယက်စ်ကို လာလီဂါ ကလပ် ကနေ ထွက်ခွာသွားအောင် တွန်းပို့လိုက်တာမျိုး ဖြစ်ချင်မှ ဖြစ်မှာပါ။ စာချုပ်သက်တမ်း တစ်နှစ်ပဲ ကျန်တော့တဲ့ ဘရာဇီးလ် တောင်ပံကစားသမားကို အာဆင်နယ်က စိတ်ဝင်စားနေပြီး စာချုပ်သစ် ဆွေးနွေးမှုတွေလည်း အဆင်မပြေ ဖြစ်နေပါတယ်။ ပီရက်ဇ်ရဲ့ အမြင်အရတော့ ဒီယိုမန်ဒီကို ခေါ်ယူလိုက်တာဟာ ဗင်နီးစီးယက်စ်ရဲ့ လစာ တောင်းဆိုမှုတွေကို လျှော့ချဖို့ အကျပ်ကိုင်မှုမှာ အသာစီးရစေနိုင်ပါတယ်။
အကယ်၍ ဗင်နီးစီးယက်စ်သာ ဆက်ရှိနေရင် အမ်ဘာပေး၊ ဘယ်လင်ဟမ် တို့နဲ့ အတူ စူပါစတား လေးဦးတွဲ တိုက်စစ် အဖြစ် ပွဲထွက်လာတာ ကိုလည်း မြင်တွေ့ရနိုင်ပါတယ်။
ဒါပေမယ့် ရိုဒရီဂို အတွက်တော့ အခြေအနေ မကောင်းပါဘူး။ ဒီနွေဦးမှာ ACL ဒဏ်ရာရရှိခဲ့ပြီးနောက် လပေါင်းများစွာ အနားယူနေရတာမို့ သူ့ရဲ့ ညာတောင်ပံ နေရာကို ဒီယိုမန်ဒီ က ခေတ္တ အစားထိုးသွားဖို့ ရှိပါတယ်။ စာချုပ် သက်တမ်း ၂၀၂၈ အထိ ကျန်သေးတဲ့ အသက် ၂၅ နှစ် အရွယ် ကစားသမား အတွက် မက်ဒရစ်တို့ ကမ်းလှမ်းမှုတွေကို စတင်စဉ်းစားလာနိုင်ပါတယ်။ ဒါ့အပြင် ဘရာဟင်မ် ဒီးယက်ဇ်နဲ့ ဖရန်ကို မာစတန်တူအိုနို တို့လည်း အရန်ခုံမှာ ပိုမို အချိန်ဖြုန်းရနိုင်ဖွယ် ရှိပါတယ်။
ဒီယိုမန်ဒီနဲ့ အတူ ရီးရဲလ်မက်ဒရစ် ဘယ်လို ပွဲထွက်လာနိုင်မလဲ
နည်းပြသစ် ဟိုဆေး မော်ရင်ညို အကြိုက်တွေ့တဲ့ ၄-၂-၃-၁ ကစားကွက်မှာ ဒီယိုမန်ဒီ ဟာ တောင်ပံ တစ်နေရာရာမှာ ကစားရဖို့ သေချာသလောက် ရှိပါတယ်။ အကယ်၍ ဗင်နီးစီးယက်စ် မထွက်ခွာဖြစ်ခဲ့ရင် ဒီယိုမန်ဒီဟာ ညာတောင်ပံမှာ ဝင်ကစားမှာ ဖြစ်ပြီး တိုက်စစ် နေရာစုံ ကစားနိုင်စွမ်းက မော်ရင်ညို အတွက် အားသာချက် ဖြစ်လာပါလိမ့်မယ်။
ဒီယိုမန်ဒီရဲ့ ညာတောင်ပံ ကစားဟန်ဟာ မက်ဒရစ် တိုက်စစ်ကို ကွဲပြားတဲ့ ပုံစံ တစ်ခု ပေးစွမ်းနိုင်မယ့် အပြင် အမ်ဘာပေပးကို ပိုမို ပံ့ပိုးပေးနိုင်မှာ ဖြစ်သလို၊ ညာနောက်ခံလူ ထရန့် အလက်ဇန္တား အာနိုးလ်နဲ့လည်း ထိရောက်တဲ့ တွဲလုံးတွေ ဖန်တီးနိုင်မှာပါ။ လစ်ဗာပူးလ် မှာတုန်းက ဆာလာဆီ ခွန်အားပါပါ ပေးပို့မှုတွေ လုပ်ခဲ့သလိုပဲ၊ အိုင်ဗရီကို့စ် ကြယ်ပွင့်ရဲ့ လျှင်မြန်တဲ့ အရှိန်နဲ့ နောက်တန်း အနောက်ဆီ ပြေးဝင်နိုင်စွမ်းကြောင့် စပိန်မြေမှာလည်း ဒီပုံစံကို ပြန်လည် မြင်တွေ့ရဖွယ် ရှိနေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
