ပြီးခဲ့တဲ့ လက်ရှိမှာ ချဲလ်ဆီး နည်းပြ အဖြစ် ခန့်အပ်ခံထားရတဲ့ ဇာဘီ အလွန်ဆို ကတော့ ပြီးခဲ့တဲ့ ၂၀၂၅-၂၆ ရာသီတုန်းက ရီးရဲလ်မက်ဒရစ် အသင်းမှာ ၈ လနီးပါးသာ တာဝန်ယူခဲ့ရပြီး ရာထူး ကနေ ထုတ်ပယ်ခံခဲ့ရသူပါ။ ဒါပေမယ့်သူဟာ ဒီကျရှုံးမှု အခက်အခဲတွေကို အပြီးတိုင် ကျော်ဖြတ်နိုင်ခဲ့ပြီလို့ ပြောဆိုလိုက်ပါတယ်။ ဒါ့အပြင် ပရီးမီးယားလိဂ် ကလပ် ချဲလ်ဆီးကို ကိုင်တွယ်ရတာဟာ သူ့ရဲ့ နည်းပြ ဘဝကို ပြန်လည် တည်ဆောက်ဖို့ အကောင်းဆုံး အခွင့်အရေး တစ်ခု ဖြစ်တယ်လို့လည်း ယုံကြည်နေပါတယ်။
အလွန်ဆိုဟာ ၂၀၂၃-၂၄ ရာသီတုန်းက ဘေယာ လေဗာကူဆင်ကို ရှုံးပွဲ မရှိ စံချိန်နဲ့ ပြည်တွင်း ဆုဖလား ၂ ခုစလုံး ဆွတ်ခူးပေးခဲ့ပြီးနောက် ၂၀၂၅ ခုနှစ် ဇွန်လမှာ ရီးရဲလ်မက်ဒရစ် နည်းပြ အဖြစ် စတင် တာဝန်ယူခဲ့တာပါ။ ဒါပေမယ့် ပွဲပေါင်း ၃၄ ပွဲ (၂၄ ပွဲနိုင်၊ ၄ ပွဲသရေ၊ ၆ ပွဲရှုံး) အပြီး ဇန်နဝါရီလ အလယ်မှာပဲ ရာထူး ကနေ ထုတ်ပယ်ခြင်း ခံခဲ့ရပါတယ်။ အဲဒီအချိန်မှာ ရီးရဲလ်မက်ဒရစ်ဟာ လာလီဂါ အမှတ်ပေးဇယား ထိပ်ဆုံးက ဘာစီလိုနာရဲ့ အနောက် ၄ မှတ်အကွာမှာ ရောက်နေခဲ့သလို၊ စပိန် စူပါဖလား မှာလည်း ခါးသီး ပြိုင်ဘက် ဘာစီလိုနာကို ရှုံးနိမ့်ခဲ့ရပါတယ်။ ဒါ့အပြင် အသင်းရဲ့ ကြယ်ပွင့် ကစားသမားတွေ ဖြစ်ကြတဲ့ ကီလီယန် အမ်ဘာပေး၊ ဗင်နီးစီးယက်စ် ဂျူနီယာ တို့နဲ့လည်း ဆက်ဆံရေး အဆင်မပြေမှုတွေ ရှိခဲ့တယ်လို့ သတင်းတွေ ထွက်ခဲ့ပါသေးတယ်။
အလွန်ဆို ထွက်ခွာသွားပြီးနောက် ရီးရဲလ်မက်ဒရစ်ဟာ နည်းပြသစ် (လက်ရှိ ဖူလ်ဟမ် နည်းပြ) အဲလ်ဗာရို အာဘီလိုအာ လက်ထက်မှာ ပိုမိုဆိုးရွားသွားခဲ့ပြီး ဘာစီလိုနာထက် ၈ မှတ် အကွာနဲ့ ရာသီသိမ်းခဲ့ရသလို၊ မေလမှာ ကစားခဲ့တဲ့ အဲလ်ကလက်ဆီကို ပွဲမှာ ၂-ဂိုး မရှိနဲ့ ရှုံးနိမ့်ကာ ဘာစီလိုနာ ဗိုလ်စွဲတာကို ကြည့်ရှုခဲ့ရပါတယ်။
စတမ်းဖို့ဒ်ဘရစ်ချ်က စိန်ခေါ်မှုသစ်နဲ့ အလွန်ဆိုရဲ့ ရင်ဖွင့်သံ
အလွန်ဆို ကတော့ ရီးရဲလ်မက်ဒရစ်မှာ ကြုံတွေ့ခဲ့ရတဲ့ ဒဏ်ရာဟောင်းတွေ အားလုံး ကျက်သွားခဲ့ပြီလို့ BBC Sport နဲ့ အင်တာဗျူးမှာ ဆိုပါတယ်။ “ကံကောင်းစွာနဲ့ပဲ ကျွန်တော့်ရဲ့ ကစားသမားနဲ့ နည်းပြဘဝမှာ စိတ်ဒဏ်ရာ ကြီးကြီးမားမား အများကြီး မရှိခဲ့ပါဘူး။ ရီးရဲလ်မှာ ဒဏ်ရာ တစ်ခု ရခဲ့ပေမယ့် အခုတော့ ကျက်သွားပါပြီ။ ရီးရဲလ်မှာ စတင်ခဲ့တုန်းကလိုပဲ ဒီအဆင့်သစ်ကို ပျော်ပျော်ရွှင်ရွှင်နဲ့ ဖြတ်သန်းဖို့ သန္နိဋ္ဌာန် ချထားပါတယ်။”
“မအောင်မြင်ခဲ့တဲ့ အရာတွေ အတွက် ကျွန်တော် ကိုယ့်ကိုယ်ကိုယ် အမြဲ ဝေဖန်ဆန်းစစ်ခဲ့ပြီး ဘာတွေ ပိုကောင်းအောင် လုပ်နိုင်မလဲဆိုတာ စဉ်းစားခဲ့ပါတယ်။ စိတ်ပျက်စရာတွေဆီကနေ သင်ခန်းစာ ယူရတာပေါ့။” လို့ အလွန်ဆိုက ပြောပါတယ်။
ချဲလ်ဆီးဟာ ပြီးခဲ့တဲ့ ၂၀၂၅-၂၆ ရာသီက နည်းပြ အန်ဇို မာရက်စကာနဲ့ လီယမ် ရိုစီနီယာ နည်းပြ နှစ်ယောက် အထိ အပြောင်းအလဲ လုပ်ခဲ့ရပြီး ပရီးမီးယားလိဂ် အဆင့် (၁၀) နဲ့သာ ရာသီသိမ်းခဲ့ရတာပါ။ ၂၀၁၆-၁၇ ရာသီက အန်တိုနီယို ကွန်တီ လက်ထက် ချန်ပီယံ ဖြစ်ခဲ့ပြီး ကတည်းက ပရီးမီးယားလိဂ် အဆင့် (၃) ထက် ပိုမိုမြင့်မားတဲ့ အဆင့်ကို မရောက်ဖူးတော့သလို၊ နောက်ဆုံး ၄ ရာသီမှာ ၃ ရာသီ အထိ Top-4 ဝင်ရောက်နိုင်ခြင်း မရှိခဲ့ပါဘူး။
ဒါပေမယ့်လည်း အလွန်ဆို ကတော့ စတမ်းဖို့ဒ်ဘရစ်ချ်ရဲ့ အခြေအနေဟာ ထင်သလောက် မဆိုးရွားကြောင်းနဲ့ အသင်းပိုင်ရှင် BlueCo အဖွဲ့ရဲ့ ပံ့ပိုးမှု အောက်က ဗြိတိန် စံချိန်တင် ပြောင်းရွှေ့ကြေး ပေါင် ၁၁၇ သန်းနဲ့ မော်ဂန် ရော်ဂျာစ် အပါအဝင် ကစားသမား ၉ ယောက် အထိ ခေါ်ယူပေးထားကြောင်း ပြောသွားခဲ့ပါတယ်။
ကိန်းဂဏန်းတွေက သက်သေပြနေတဲ့ အလွန်ဆိုရဲ့ စွမ်းဆောင်ရည်
၂၀၂၂-၂၃ ရာသီ စတင်ချိန်က စလို့ ဥရောပ ထိပ်သီးလိဂ် ၅ ခုမှာ နည်းပြတွေရဲ့ တစ်ပွဲ ပျမ်းမျှ ရမှတ် ရရှိမှုကို ကြည့်ပါက ဇာဘီ အလွန်ဆိုဟာ ၂.၂ မှတ် အထိ ရရှိထားပြီး၊ လူးဝစ် အန်နရီကေးနဲ့ ကာလို အန်ဆယ်လော့တီ (၂.၂၅ မှတ်) တို့ နှစ်ဦးတည်းကသာ အလွန်ဆိုထက် ပိုမိုသာလွန်တဲ့ စံချိန် ရရှိထားတာ ဖြစ်ပါတယ်။
အလွန်ဆိုရဲ့ ချဲလ်ဆီးဟာ ရာသီကြို ပြင်ဆင်မှု အဖြစ် လာမယ့် ဗုဒ္ဓဟူးနေ့ ဟောင်ကောင်မှာ ဂျူဗင်တပ်စ်နဲ့ ခြေစမ်းပွဲ ကစားသွားမှာ ဖြစ်ပြီး၊ အေစီမီလန်၊ ဂျိုဟိုးလ် ဒါရူး တာဇင်၊ ရီးရဲလ်ဆိုစီဒက် တို့နဲ့ ဆက်လက် ယှဉ်ပြိုင် ကစားရမှာ ဖြစ်ပါတယ်။ အဲဒီနောက် သြဂုတ် ၂၄ ရက်မှာ ဖူလ်ဟမ် အသင်းနဲ့ ပရီးမီးယားလိဂ် ပွဲဦးထွက် ကစားသွားရမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
